البوابة الكبيرة .. بتقفل في الميعاد , ويدقُّوا الشمع الأحمر زي ما قال الكتاب
وقبل الساعة واحدة بيدخل الإيراد .. يعني من غير مؤاخذة , المساجين الجُداد
علي باب ضابط هتلاقي هاني بيه , بيحضَّر في الزباين والدفتر بين ايديه
وعبد السلام يساعد بحكم الأقدمية , ويقول تمام يا باشا وكله مية مية
وأهو كل يوم بيورد إيراد علي كل لون , مدام فيه شمس طالعة ع الدنيا كل يوم
زبون جاي يقضي مده , وده مستني القضا , وده حبس احتياطي علي ذمة محكمة
أما إيراد النهاردة .. فيه مسجون أُبّهة ,, لابس نظارة سودا , علي بدلة مفخفخة
واقف قرفان لوحده , ومبحلق في السما ..
وينادي البيه نبطشي , أمين محمود نبيه , يردّ يقول حاسب .. دنا بيه وإبن بيه
والبيه يقوله حلوة , بتقول إيه يا بيه ؟!
لما أنت بيه يا شاطر .. جاي تتفسّح هنا ؟!
ويبُصّ في النموذج , وصحيفة التجرمة , التهمة مــال عمومي , عشر سنين ضنا
ويقوله آه ياباشا دا جنابك حــوت كبير , دنا هعمل فيك عمايل ولا هفاف الغسيل
قام صاحبنا ردّ قال : أنت عارف انا أبقي مين ؟!
لو بتقرأ في الجرايد كنت تعرف مين أمين ..
قاله : ما يهمش أسامي , رحت جيت إسمك حرامي
م اللي بيمصوا الأماني , من عيون العميانين
حتي لما هقول حرامي يمكن أظلم ناس كتير ناس بتسرق أيوة جايز , كانوا فقرا ومحتاجين
يعني دانتا واللي زيك من كبار الشفّاطين
لمّا تاكلوا نُص حلّة اللي فاضل يكفّي مين ؟!
ثُم خُد هنا هوه تعالي
مش دا لبس المسجونين , إنت رايح سهرة حمرا , ويّا شلة هفافين
إمشي غور غيّر هدومك , تعالي خده يا عبسلام
إحلقولوا نمرة زيرو , خلّوا جلد الرأس يبان
الجدع دا بيعمل إيه ؟!
بردو لازم أروح وأقوله
خِف حبّة يا هاني بيه
فيه بشر عظمتها جامدة الله يحميك م العدا
من زمان من كام سنة , كان فيه بيه موجود هنا
كانت طِباعه من طِباعك , بس جُم نقلوه قِنا
كان رجولة وانسانية , كان نزاهة ومفهومية
كله عنده حتّة واحدة , راسه زيّك كانت عفيّة
قالي بُص يا واد يا عبده !!
أي قــرد بيسخطوه ؛؛
قُلت يبقي قرد برضه ,, ومستحيل يقدروا في يوم .. يعرفوا يغيّروه ...
بــقلمي
via منتديات ماجدة http://majdah.maktoob.com/vb/majdah325146/?amp;goto=newpost
ليست هناك تعليقات:
إرسال تعليق